زين العابدين عماد عبد عودة الزيادي

1:20 ص
تقريبا بعد نص ساعة من الاستـ،،ـهداف الفجر لقيادة عمليات الأنبار
اجاني أتصال ماسنجر من صديق اول مرة يتصل بيه :

: السلام عليكم عمي ( صوت خشن شايب بس مخنوك )
: و عليكم السلام عمي كل الهلا حياك الله
: عمي عندك اسماء الشـ،ـهداء مال الانبار ؟ ( اسمع شلون صدره يلهث و صوت خارج البيت واضح طالع بره يخابر )

صفنت ثواني لان بالعادة هواي عالم تريد تعرف منو الشـ،ـهداء
او ناس تسأل إذا عدها صديق يدام هناك
مباشر جاوبته :

: حجي انت عندك احد هناك ؟
: اي عمي أوليدي ( ابني ) هناك و جهازه مغلق حتى ربعه ماكو

رجعت صفنت و عدلت كعدتي و حلگي ماينطق شلون بيه ؟ باوعت لأخوي كاعد بصفي واني فتحت سبيكر
جاوبته و خنكتني العبرة :

: عمي قبل لا اجاوبك اريد منك شغلة وحدة
: اي عمي احجي فدوة اروحلك
: عمي اريد منك بس تتذكر الامام الحسين هسه
: عمي شعندي غير الحسين فدوة اروحله اني وابني
: عمي ان شاء الله مابي شي واذا لا سامح الله بي شي هنيالكم و هنيالك انت بي و جهازه مغلق لان من يصير استـ،،ـهداف باي مكان يغلقون الشبكة بكل المنطقة هسه راح اشوفه وين و اطمئن
: بختك و بخت اهلك انتظرك عمي
: صار تامر امر عمي اطمئن

2:33 ص

ابو العمليات : دورنا مستشفيات الفلوجة و الرمادي ماكو هيج اسم
راح استمر بالبحث عنه شوية اتاخر شبكة ماكو و اتصال مفقود

رجعت اتصلت بالحجي
: عمي اسم ابنك الكامل شنو ؟
: زين العابدين عماد عبد عودة الزيادي ، يداوم بالقلم عمي هناك
: حجي دزلي صورته بلا زحمة
: هاي صورته عمي ( مخلي منشفة على جتفه )

3:29 ص

طابقت صورته وياه الجرحى ماكو
دزولي اسم جريح و حالته مستقرة هم اسمه ( زين العابدين )
طلع مو هو

4:34 ص

دزيت رسالة للحجي
: عمي ماكو بالمستشفيات ولا وياه الجرحى ، ان شاء الله هو بغير مكان بس شبكة ماكو اطمئن
: عمي يمكن جريح اني راح اطلع من السماوة لمستشفى الفلوجة بختك و بختك اهلك ان شاء الله ماكو شي يا صاحب الزمان يا فاطمة الزهراء

ما اكدر اكله عمي الولد بعدهم جوه الأنقاض و ابو الإسعاف ما راحلهم ضربوا

8:02 ص

ابو العمليات : السلام عليكم خوية الوالد الي تبحث عنه ( شهيد )
يابويه 💔

2:51 م

: عظم الله اجرك حجي ، و هنيئاً الكم هذا وسام الشرف ، مع الحسين ان شاء الله

انتهت الليلة و مصيبتي
الذي اتصل بي هو عماد ابو محمد والد الشهيد زين العابدين
و عظم الله اجرنا و اجركم